নাট মঞ্চটো নিৰ্ম্মাণ কৰিবলৈ পূঁজি সংগ্ৰহৰ প্ৰক্ৰিয়াটো চলি থকা অৱস্থাতে স্বাভাৱিকতে নাট-মন্দিৰটোৰ নামকৰণৰ প্ৰসঙ্গটো আহি পৰিল । অ:ভা:উ:সা: সভাৰ এখন কাৰ্য্য-নিৰ্ব্বাহক সভাত এই বিষয়টো দাঙিধৰা হ’ল যদিও সেইসভাত নামকৰণৰ বিষয়ত এটা স্থিৰ সিদ্ধান্তলৈ আহিব নোৱাৰি ততালিকে এখন সাধাৰণ সভা আহ্বান কৰিব লগা হ’ল।

সেই সভাতো নামাকৰণৰ বিষয়ত দুটা দলৰ মাজত বাক-বিতণ্ডা আৰম্ভ হ’ল।

৺হৰিবিলাস আগৰৱালা দেৱৰ নেতৃত্বত এটা দলে নাট-মন্দিৰটোৰ নাম ‘মহাভৈৰৱ নাটমন্দিৰ’ আৰু ৺ভৱানীচৰণ ভট্ৰচাৰ্য্যদেৱৰ নেতৃত্বত আন এটা দলে নাট-মন্দিৰটোৰ নাম ‘ভৈৰৱী নাটমন্দিৰ’ হ’ব লাগে বুলি নিজ নিজ যুক্তিৰ অৱতাৰণা কৰিলে।

নাটমন্দিৰৰ নামাকৰণ প্ৰসঙ্গ

ফলত সেই সভাতো নাট-মন্দিৰটোৰ নামকৰণৰ সিদ্ধান্ত নোহোৱাত এক পক্ষৰ অন্তত আকৌ এখন সাধাৰণ সভা আহ্বান কৰিব লগা হ’ল।
এইখন সভাত অভিজ্ঞ আৰু সুচতুৰ ৺গোহাঁঞি বৰুৱাদেৱে আগভাগ লৈ সকলোৰে সমাদৃত ৺জয়দেৱ শৰ্মা পণ্ডিতদেৱক সভাপতি পাতি দিলে। তেজপুৰ নৰ্ম্মাল স্কুলৰ প্ৰাক্তন শিক্ষক ৺শৰ্ম্মাদেৱে সেইসময়ত তেজপুৰৰ পৰা প্ৰকাশিত ‘আসাম বন্তি’ৰ সম্পাদক আৰু অসম চেণ্ট্ৰল প্ৰেছৰ যুটীয়া স্বত্বাধিকাৰী। শান্ত-সমাহিত,গুৰুগম্ভীৰ ব্যক্তিত্বৰ এইজন লোকক সেইদিনাৰ সভাত সভাপতিৰ আসনত বহুৱাই ৺গোহাঁঞিবৰুৱাদেৱে সমাজৰ প্ৰতিপত্তিশালী দুয়োতা দলৰে মুখিয়াল সকলক বশীভূত কৰি নাটমন্দিৰটোৰ নামকৰণৰ ক্ষেত্ৰত স্থিৰ সিদ্ধান্তলৈ অহাৰ এটা গোপন পৰিকল্পনা কৰি লৈছিল।

সেইমতেই দুয়োদলৰ মাজত নাটমন্দিৰটোৰ নামকৰণকলৈ পুনৰ বাক-বিতণ্ডা আৰম্ভ হওঁতেই বাণৰজাৰ ৰাজধানীত নিৰ্ম্মাণ কৰিবলৈ লোৱা প্ৰস্তাৱিত নাটমন্দিৰটোৰ নাম বাণ নাটমন্দিৰ ৰাখি পুৰণি ঐতিহ্যলৈ যথাযুক্ত সন্মান জনোৱাৰ এটা কৌশলী প্ৰস্তাৱ দাঙি ধৰে।

উপস্থিত সকলো সদস্যই বিপুল হাত-চাপৰিৰে ৺ গোহাঁঞিবৰুৱাদেৱৰ প্ৰস্তাৱটোলৈ সমৰ্থন জনোৱাৰ লগেলগেই সভাপতি ৺শৰ্ম্মাপণ্ডিতদেৱে নাট-মন্দিৰটোৰ নাম সৰ্ব্বসন্মতি ক্ৰমে ‘বাণ নাটমন্দিৰ’ ৰখা হ’ল বুলি ঘোষণা কৰিলে। ৺ গোহাঁঞিবৰুৱাদেৱে যথাৰ্থভাবেই তেখেতৰ “মোৰ সোঁৱৰণীত” এই কথা উল্লেখ কৰিছে। নামকৰণ প্ৰসঙ্গত তেখেতে আৰু লিখিছে… “পাছে পাচলৈ থিয়েটাৰৰ বতাহে পাই নাটমন্দিৰৰ অসমীয়া চালিখন উৰুৱাই নিয়াত তাৰ ঠাই ষ্টেজ নামৰ টালিয়ে অধিকাৰ কৰিছে। এতিয়া সেই আলমতে বাণ নাটমন্দিৰটি বাণষ্টেজ নামে জনাজাত হৈছে।” সেইখন সভাতেই নাটমন্দিৰটোৰ নামৰ লগত ৰজিতা খোৱাকৈ এখন নাটক লিখিবলৈ ৺ পদ্মনাথ গোহাঁঞি বৰুৱাদেৱক দায়িত্ব দিয়া হয়। (ক্ৰমশঃ)

The hundred-year history of Baan Theatre.

Editor: Sri Bankim Sarmah & Sri Hemanta Kr. Baruah.